Fosil gidaria: Gerra Zibilaren arkeologia

Fosil gidaria: Gerra Zibilaren arkeologia aldi baterako erakusketak iraganaren materialtasunaren eta orainaren gizartearen arteko topagune izan nahi du. Arkeologian, «fosil gidariaren» kontzeptuak aldi oso baten karakterizazio sintetikorako balio duen material edo objektu bati egiten dio erreferentzia. Une historiko bati bakarrik atxikitzen zaion pieza da: hots, ez da espazio-denbora jakin baten aurretik edo ondotik agertzen. Beraz, fosil gidari batek datazio-elementu gisa ere funtzionatzen du. Lagin honetan, gure buruari galdetzen diogu: zeintzuk dira euskal paisaia garaikidean irauten duten 1936ko Gerra Zibileko fosil gidariak? Galdera horri erantzun nahi diote hormigoizko gotorlekuen hondakinek, borrokalarien grafitiek, paper eta munizio zatiek, eta lubakietan aurkitutako beste objektu batzuek.